A Plataforma Galega en Defensa do Ensino Público valora moi positivamente o
resultado do boicot ás reválidas que
empezaron este martes 30 de maio en 3º de Primaria. Segundo os datos da
Plataforma Galega máis do 80% das familias decidiron non enviar aos seus fillos e fillas a facer estas probas. Incluso
houbo centros nos que non foi ningún alumnado. Desde a Plataforma Galega
agradecemos ás familias o esforzo realizado para volver a evidenciar a súa
oposición á LOMCE, con todas o sacrificio que lles supón non poder enviar
durante dous días aos seus fillos e fillas aos centros educativos.
Unha vez máis o rexeitamento supera o 80%, con cifras de participación
mínimas e semellantes as que se deron nas reválidas de 6º Primaria e de 4º da ESO a semana pasada, e
que ademais superan as do ano pasado. “Agardamos que á vista dos datos a
Consellaría de Educación non continúe coa mentira e acepte que estas aprobas o
único que diagnostican, de maneira democrática e contundente, é a oposición das
familias, da comunidade educativa e da sociedade no conxunto a que se siga
aplicando a LOMCE”, explica Anxo Louzao, en nome da Plataforma Galega.
Despois desta
contundente resposta, a Plataforma Galega en Defensa do Ensino Público seguirá
loitando co firme propósito de que se derrogue a LOMCE, e que o próximo curso o alumnado poida rematar o
curso con normalidade e sen unhas probas que para o único que serven e para
someter ao alumnado a un estrés innecesario, que poñen en cuestión o
traballo do profesorado, xerarquizan as materias, na medida en que non todas
son avaliadas e introducen os fundamentos do neoliberalismo, cun modelo
competitivo e segregador. “Agardamos que o conselleiro abandone o seu
seguidismo das directrices de Madrid e empece a ter consideración a opinión do profesorado, dos pais e das nais, e do sistema educativo galego no seu conxunto”,
engade Louzao.
En opinión da Plataforma Galega
se houbera unha mínima vontade de ter en conta a opinión da comunidade escolar
no Pacto pola Educación, paralizaríanse
estas probas, derrogaríase a LOMCE e a partir de aí abriríase un debate
para consensuar o futuro dunha Lei Galega de Educación.
