A Plataforma Galega en Defensa do Ensino Público esixiu
este martes 2 de decembro en rolda de
prensa solucións para as diferentes problemáticas que inciden negativamente na
boa marcha do curso escolar e que están a supor un deterioro do ensino público.
A Plataforma Galega en Defensa do Ensino
advertiu que os orzamentos da Consellaría de Educación para o ano 2016 non van resolver as carencias
que existen, insistiu na necesidade dun
novo modelo de xestión do comedores escolares e demandoulles ás diferentes
organizacións políticas que se presentan ás eleccións xerais o compromiso de
derrogar a LOMCE. A PGDEP tamén anunciou
a súa participación na cadea humana que se vai realizar en Malpica o 12 de
decembro ás 12:00 horas para defender unha nova regulación da atención
educativa domiciliaria que fixe dereitos e obrigas para a administración.
Á vista da publicación esta fin de semana dun novo real
decreto que regula a avaliación final de 6º de Primaria, a Plataforma xa avanzou
que, no caso de manterse, animará as
familias a que amosen o seu rexeitamento a esta proba como xa o fixeron coa de
terceiro o curso pasado. Na rolda de prensa advertiuse ademais do problema que
se presenta en moitos centros nos que en 1º de Bacharelato non existe unha
alternativa á materia da Relixión. Xaquín Bermello, en representación do
estudantado, puxo en valor a loita contra a LOMCE como unha loita necesaria que
se ten que manter no futuro con novas mobilizacións se non se derroga despois
das próximas eleccións.
Fernando Lacaci referiuse á inexistencia dun sistema de
atención educativa domiciliaria como se evidenciou nos últimos meses. Explicou
que a Consellaría de Educación respondeu a esta demanda cun protocolo “para tapar voces antes
das leccións”, que non garante o dereito, que se limita a ser unha declaración de
intencións e que está baseado no voluntarismo das familias, dos docentes… Por
esta razón a Plataforma Galega en Defensa do Ensino Público reclama que se inicie
o proceso de novo, desde o inicio, coa
apertura dun diálogo, no que participen as partes implicadas e tamén pedagogos,
psicólogos, médicos, as familias e incluso profesorado experto na materia que
pasou por esta situación e que pode achegar a súa experiencia persoal.
A Plataforma Galega en Defensa do Ensino Público tamén
analizou polo miúdo os orzamentos da Consellaría de Educación que supoñen un decrecemento desde o ano 2009 dun
33% (680 millóns) e que, en palabras de Anxo Louzao, van contribuír a
deterioralo, acrecentar a privatización, a segregación e as diferenzas sociais.
“Este orzamentos -engadiu- inviabilizan a igualdade de
oportunidades, ignoran o ensino en galego e a normalización, non van crear
emprego, os centros continuarán sen profesorado, abandonan a calidade,
descoidan a escolarización do alumnado con necesidades educativas especiais e
condena o 40% das familias a pagar os libros de texto , as actividades
extraescolares e o comedor escolar, entre outras cuestións”.
Na rolda de prensa da Plataforma Galega en Defensa
do Ensino Público participaron Carmen Romero da AS-PG, Anxo Louzao da CIG-Ensino, Fernando Lacaci da Federación de ANPA de Compostela, Xosé Bustelo da
Federación de ANPA da Costa da Morte, Adrián Dios do BNG, Xaquín Bermello dos Comités e Alberte Mera de Galiza Nova. Da Plataforma
forman parte tamén Agir, Federación Provincial de ANPA de Lugo (FAPACEL),
Liga Estudantil Galega, Federación de ANPA de Ferrolterra (FEANPAS), Movemento
Dezao en Defensa do Ensino Público, Sindicato de Estudantes e a Federación de
ANPAS de Centros de Ensino Público da Comarca Condado
Paradanta-Louriña (FANPO).
