O borrador do decreto lei estabelece que, no futuro, as reválidas terán valor académico
A Plataforma Galega en Defensa do Ensino
Público (PGDEP) fixo este martes, en rolda de prensa, un chamamento á
comunidade escolar a sumarse á xornada de loita convocada para este
xoves, día 24 de novembro, contra as reválidas e a LOMCE, e a participar
nas mobilizacións convocadas tanto pola mañá como pola tarde nas sete
cidades e en Vilagarcía, Cee e Carballo. O seu portavoz, Anxo Louzao,
denunciou que mentres o goberno simula que as reválidas desaparecen,
prepara un decreto lei no que se vai estabelecer que, no futuro, terán
valor académico.
A este respecto Louzao advertiu que os anuncios que se veñen
facendo estes días son consecuencia das mobilizacións, que puxeron de
manifesto o maioritario rexeitamento tanto á LOMCE como ás reválidas.
Porén alertou da “dobre linguaxe e do engano” do goberno central, xa que
mentres lanza á opinión pública a idea de que as reválidas desaparecen
ten xa redactado un borrador de decreto lei no que se recolle que agora
se adían mais que no futuro terán valor académico, tanto para ESO como
para bacharelato.
“Non di a partir de que curso, porque en lugar
do ano poñen puntos suspensivos. Entendemos que á espera de que se
acorde formalmente na Conferencia de conselleiros de Educación prevista
para o día 28 de novembro”, matizou o portavoz da plataforma.
Xunto
a isto, Louzao considerou “contraditorio, inxustificábel e demagóxico”
que se fale dun pacto educativo cando, tras aprobarse a resolución do
Parlamento español que exixe a derrogación da LOMCE, desde o PP, se fale
mesmo de levar esta cuestión ao Tribunal Constitucional “recorrendo a
todos os mecanismos ao seu alcance para evitar a súa derrogación”.
O
portavoz da PGDEP recoñeceu que para este curso as reválidas de ESO van
ser só unha mostraxe, “seguramente porque lles era imposíbel levalas a
cabo a estas alturas”, pero insistiu en que “non desaparecen como
tales”.
No entanto, advertiu que a reválida de bacharelato aínda
que non terá valor académico para titular agora –si nun futuro- serán
imprescindíbeis para acceder á universidade. Por iso reiterou a súa
denuncia do “calvario” que se lle está facendo pasar ao alumnado e ao
profesorado porque de momento só está avanzado un borrador e non se
coñecerá até decembro en que consistirán exactamente.
Louzao
explicou que o proxecto de Orde ministerial, no cal se fixan as
características, o deseño e o propio contido das futuras reválidas de
segundo de bacharelato, amosa diferenzas substanciais no que ten a ver
coas materias, contidos e modelo de probas en relación ás actuais PAU,
aínda que o Ministerio continúe asegurando que serán semellantes.
Silencio da consellaría
A
PGDEP manifestou tamén a súa preocupación polo “silencio” que mantén a
consellaría de Educación a respecto desta cuestión e denunciou que nin
sequera se sabe cal vai ser a súa posición na Conferencia Sectorial de
Educación do vindeiro día 28. Unha posición que Louzao considerou que
debería ser acorde coa posición da sociedade galega, de maioritario
rexeitamento.
A Plataforma avanzou ademais que seguirá chamando á
insubmisión ás reválidas de 3º e 6º de Primaria, que se manteñen, e
tamén aos centros de secundaria que sexan seleccionados para facer a
mostraxe.
Por iso fixo un chamamento a participar masivamente na
xornada de loita deste xoves, día 24 de novembro, na que o estudantado
baleirará as aulas e a sumarse ás mobilizacións previstas tanto pola
mañá como pola tarde nas sete cidades e en Cee, Carballo e Vilagarcía,
ás 19:00 horas, agás en Vigo, onde será ás 18:00 horas.
