A Plataforma Galega en Defensa do Ensino
Público continúa na loita contra a LOMCE e vén de pór en marcha a
campaña contra as reválidas para que as familias non envíen os seus
fillos ou fillas a facer as probas xerais de primaria. Representantes da
Plataforma Galega en Defensa do Ensino Público presentaron este luns 25
de abril en rolda de prensa, en Santiago, as diferentes accións que
teñen como co obxectivo facer inviábeis as probas.
- Aprobacións nos claustros e consellos
escolares de resolucións contra as
reválidas para o seu envío á Consellaría.
Modelo de resolución para os claustros e consellos escolares
- Colocación de pancartas ou cartaces nos centros no lema “Nin LOMCE nin reválidas”.
- Concentracións o 4 de maio pola tarde nas seguintes vilas e cidades:
- Concentracións o 9 de maio durante o recreo nos centros escolares
- Concentración diante da Consellaría de Educación o 11 de maio, data na que se inician as probas.
Proposta de escrito para as familias
“Observamos con moita preocupación a posición da Consellaría de Educación que segue obstinada en seguir adiante con estas probas cando un número importante de comunidades autónomas xa anunciaron que non as van facer”, explicou Anxo Louzao, en representación da PGDEP. Louzao lembrou que estas probas emanan da LOMCE e que o Congreso dos Deputados xa aprobou unha iniciativa para paralizar a súa aplicación, tal e como lle demandou no seu día a Plataforma aos grupos parlamentarios.
Para a Plataforma estas probas son
unha aberración desde o punto de vista pedagóxico que non teñen en consideración
a avaliación continua “que desprezan, o traballo do profesorado, que é quen
mellor pode avaliar alumnado, que someten aos rapaces e rapazas a un calvario e a unha presión innecesaria, co
obxectivo de estandarizar e uniformar o sistema educativo e de crear un ranking
de centros”, explicou Louzao.
A Plataforma Galega en Defensa do Ensino Público reafirmou a súa intención
de combater desde o principio as probas, xa que van ser determinantes para a
continuidade nos estudos, parten da desconfianza do profesorado e suporán un obstáculo
máis para as clases desfavorecidas. Por todo isto a Plataforma Galega en
Defensa do Ensino Público fai un chamamento a todas as familias para que as
pretensións da Consellaría de Educación sexan un verdadeiro fracaso.
